الحرية للجميع

نحلم بمجتمع حر لا يخضع لقيود مانعه لاي تصرف او اسلوب حياة

 نحلم بحرية للجميع من يريد ان يفعل اي شيء يفعله طالما لا يضر احد اخر بهذا التصرف او الفعل نريد حرية كاملة لا نريد مقايضة بين نصف حرية ونصف امن نريد حرية ف اتخاذ قراراتنا بانفسنا نريد حريه .. حريه في اختيار اصدقائنا , حريه في ما نريد ان نتعلم وندرس .. حريه فيمن نحب ونتزوج حريه ف حياتنا لا قيود اهالي لا قيود لاحد علينا ..نريد حرية ولكن لا نريدها فوضى .. نريد حريه لعقولنا وقلوبنا لكي نفعل ما نحن مقتنعين به .. من يريد ان يصلي يصلي له مطلق الحريه في ذلك من يريد ان يشرب خمر يشربه لا نجبره على شئ فهو من سيقوم  بالفعل وهو من يتحمل عواقبه خيرا كانت او شر لا فرق بين التصرفين فكلاهما حر ..
اريد  ان اكون حرا حين اتجول ف الطريق ولا احد يلوم علي اني اتجول مبكرا او متأخرا .. لا ينتقد ملابسي لا ينتقد كيف اتصرف .. كما اريد حريه ف الابداع لا ابتذال
اريد حريه ان تكون المرأة كالرجل .. اريد حريه ف تصرفاتي اريد حريه في احلامي اريد حريه في حياتي .. 

عيد .. يا .. تحرش !

..

نحترم المرأة ف الفلانتين ونتحرش بها ف الاعياد الدينية .. هذه مقولة صحيحة الى حد ما لا اقصد اننا متحرشون ولكن سكوتنا هو التحرش بذاته .. لماذ نصمت عن محاربة تلك الجريمة .. خوف .. لا مبالاة .. قذارة .. ولا انبساط ؟!! اليوم كان اول ايام عيد الفطر المبارك وكالعادة فان عامة الشعب يخرجون ال الحدائق والشوارع الكبري للاحتفال .. فيكون التحرش هو مظهر هذا اليوم .. يتجمع صبية حول مجموعة فتايات ويقومون بلمس مناطق من اجسادهن دون ادن احساس بالذنب بل يتلذذون بهذه اللمسات ..

في السطور القادمة سأسرد لكم قصة قصيرة ليست حقيقية الاسماء او الاحداث الفعلية ولكن يحث مثلها كل يوم ليس ف الاعياد فقط ..

المكان .. منطقة لابناء الطبقة العامة من الشعب 
الزمان .. اول ايام عيد الفطر ف العاشرة صباحا ..

الاشخاص .. مجموعة مصريين ..

القصة تحكى على لسان " عبير " 19 سنة ..  بطلة الواقعة .. وستكون باللهجة العامية .. 

انا نزلت اصلي العيد مع اخواتي الولاد وبابا وصلينا ورجعت البيت وطلبت من بابا العيدية علشان انزل مع صحباتي نتفسح ف مكان قريب من بيتنا .. بابا وافق .. ونزلت انا واصحابي وكنا بنتمشى ف الشارع عادي وفجأة شوفنا شلة اطفال ما بين 10 و12 سنين كانوا حوالي 6 افراد  وبيهجموا علينا زي ما نكون فريسة.. اصحابي جريوا اول ما شافوهم جايين علينا وانا من الصدمة مقدرتش اجري .. ومفيش لحظات وكانوا حواليا وانا ف النص وكل كلب فيهم بيحاول يلمس مكان ف جسمي وانا كنت منهارة وكنت لابسة تي شيرت اتقطع ومن حسن حظي انهم اطفال سن صغير والا كنت تعرض لاغتصاب جماعي وسط الشارع .. جريت من وسطهم وركبت تاكسي وانا مش قادرة اتكلم من الصدمة .. سواق التاكسي كان ف سن بابا حوالي 50 سنة

 قالي : مالك يابنتي ؟؟

 انا كنت منهارة وبعيط ..ومن شكلي لبسي عرف اني تعرضت للتحرش ..

وقالي : معلهش دول عيال متخلفة مش متربيين

ونزل من التاكسي وجه جنبي وقالي متخافيش انا زي والدك ... وكان بيطبطب عليا ف الاول ولكن اتصدمت وانهارت اكتر لما لقيته بيحسس بايده على جسمي .. مكنتش عارفة اتصرف ازاي .. زقيته وقع ع الارض ونزلت اجري من التاكسي .. وملقيتش مكان اروحه الا القسم .. حسيت اني هكون ف امان هناك دخلت كان موجود امين شرطة قاعد ع المكتب .. قام وقف اول ما شاف شكلي لان لبسي اللي فوق كان شبه متقطع وانا كنت منهارة ..

 سألني مالك يا انسه ؟

  قولتله وكان صوتي عبارة عن عياط وكلام بسيط انا اتعرضت لتحرش ف الشارع وف التاكسي وملقيتش مكان اورحه واتصل ع بابا منه الا هنا

.. قالي متخافيش احنا هنطلب بابا وهييجي ياخدك بس الاول لازم نعمل محضر بالواقعة علشان تاخدي حقك ..قولتله ماشي بس بردو عايزة اتصل ع بابا ...

قال ماشي

 واتصلت وطلبت من بابا انه ييجي ياخدني من القسم.. وفجأة تحرك الامين من مكانه وقرب مني

 وقالي هم مدوا ايدهم فين ..

انا مقدرتش ارد .. قام قرب مني اوي ولمسني  ف مكان حساس ف جسمي انا انهارت اكتر وعيطت وزعقتله .. قام هو شتمني وقالي مفيش محضر لان مفيش دليل مادي وشهود ع الواقعة .. وفجأة ظهر شخص كان يظهر عليه الطابع المتدين .. حسيت بارتياح شوية لما شوفته ولكن كلامه كان لا يدل الا على انسان متخلف ..زعقلي وقالي ازاي بنت محترمة تنزل من بيتهم لابسة جينز وتيشرت ومش محجبة .. انتي مش متربية ولا اهلك عرفوكي معنى التربية ..

وقبل ما يخلص كلامه دخلت بنت منتقبة بس لبسها متقطع بردو .. ولقيتها بتجري ع الشخص المتدين ده

 وبتقوله الحقني يا بابا فيه عيال اتحرشوا بيا وانا مروحة البيت ..

 صُدم الشخص المتدين من كلام بنته وشكلها اللي زي شكلي بالظبط بالنسبة لتقطيع اللبس .. ودخل بابا ف اللحظات دي وانا كنت شرحتله اللي حصل ف التليفون جريت عليه اول ما دخل وانا منهارة وبعيط .. بس اتصدمت لما لقيته بيقول لامين الشرطة خلاص حضرتك احنا مش هنعمل محضر احنا مش عايزين فضايح !!!
بابا اخدني وركبت معاه  العربية وروحنا البيت .. وانا ف الطريق ف البيت كنت مش مصدقة اللي بابا قاله ..

انا مش مصدومة من الاطفال اللي بيتحرشوا ببنات اضعاف عمرهم ولا مصدومة من رد فعل الناس ف الشارع وهم واقفين يتفرجوا عليا وانا بين ايدين العيال دي وبيضحكوا او بيقولوا احنا مالنا .. ولا مصومة من سواق التاكسي اللي ف سن بابا .. ولا من فعل امين الشرطة ولا من كلام الشخص المتدين .. اللي سبب لي الصدمة الكبيرة هو جملة بابا لما قال لامين الشرطة "احنا مش عايزين فضايح " بعد الجملة دي انا انتهيت نفسيا وعرفت اني عمري ما هاخد حقي  ولا همشي بحريتي ف البلد دي تاااني ..

عرفتوا بقى ان المجتمع ده متحرش بطبعه .. سافل  بفطرته ... قذر بافعاله .. وللعلم فقط هذه القصة ليست واقعية ولكن من المؤسف ان الواقع اسواء من هذه القصة التعبيرية ..

رسالة الى طلبة الثانوية العامة

اخواتي طلبة الثانوية العامة اولا ربنا يوفقكم ويكرمكم يااااارب ... 

 
وبعدين متزعلش ومتضايقش نفسك مهما كانت نتيجتك ربنا كاتب لك نتيجتك من قبل ما تتولد وانت عملت اللي عليك وذاكرت و اجتهدت سيب الباقي على ربنا هو اكيد مش هيكتبك حاجة وحشة ... ولكل واحد رزقه ..
طيب هتزعل وتعيط وتتعب ... هل كل ده هيغير النتيجة ؟ !  لا طبعاااا ... بص بقى يا كبير كل واحد فينا ليه حلمه والكلية اللي نفسه يدخلها ... او الشغلانة اللي نفسه يكون ناجح فيها .. 
مش الثانوية ولا الكلية اللي هتحدد مستقبلك الوحيد اللي ف ايده مستقبلك بعد ربنا هو انت .. بثقتك ف نفسك وارادتك ممكن توصل لقمة النجاح .. وباكتئابك وسلبيتك ممكن توصل لقمة الفشل والانحدار ...
وعمر ما كانت نتيجتك هي مقياس مستقبلك ... مصطفى حسني كان راسب في سنة تانية ف الكلية .. وطبعا مصطفى حسني غني عن التعريف .. هو شال من دماغه فكرة الياأس والاحباط.. وايقن ان ربنا هيكرمه طالما هو بيعمل اللي عليه .. 
هتقولي كان نفسي ادخل الكلية اللي بحبها علشان لما اتخرج اشتغل ف المكان اللي بحبه .. على فكرة مش شرط انك تكون ف كلية معينة علشان تحقق حلمك ف الالتحاق بمجال شغل معين ...
ودي امثلة بسيطة لناس اشتغلت  ف مجال غير دراستها خاااالص ونجحت جدااا فيه.. 
*حمزة نمرة  حاصل على درجة البكالوريوس من كلية التجارة الخارجية  ونجح كـ مؤلف موسيقي ومغني وعازف جيتار.
* باسم يوسف  تخرج باسم يوسف من كلية الطب . ودلوقتي هو اشهر اعلامي ف الوطن العربي ومن اشهر الاعلاميين ف العالم .
*مصطفى حسني حاصل على بكالوريوس تجارة وهو الان من اشهر الدعاة . 
* انا الان بدرس اداب تاريخ .. ولكن بدأت احقق حلمي بشتغل صحفي تحت التمرين 
*الرئيس السابق مرسي خريج هندسة .. وكان بيشتغل رئيس جمهورية :D 
.... سيبك من كل ده ... انتي دلوقتي حالك احسن من ناس كتير ... افتكر ان فيه ناس مش لاقيه تتعلم اصلا ... فيه ناس بتنام ف الشارع ... 
بعد ما تجيب نتيجتك قوم صلي ركعتين واحمد ربنا .. كل اللي يجيبه ربنا كويس ...وخلي ثقتك ف ربنا كبيرة وثق ف نفسك انك ممكن تنجح وتحقق كل احلامك مهما كانت كبيرة ... لما احلامك تكن كبيرة . ده دليل ان طموحك كبير ودي مش حاجة وحشة طبعاااا ...

وبعدين فكر ياعم ، دلوقتي الدكاترة والمهندسين وغيرهم من طلبة الكليات ، بيتقبض عليهم من كلياتهم ،وبيموتوا فيها .

اخيرا ... ربنا يكرمكم ياااارب وتحققوا كل اللي نفسكم فيه .... 

غرام ف البنزينة

تشهد البلاد الان من الازمات السياسية والاقتصادية ولعل ابرز تلك الازامات هي ازمة البنزين وما تشهده شوارعنا من طوابير السيارات امام محطات البنزين وما تشهده تلك الطوابير من احاديث جانبية بين اصحاب وسائقي السيارات وخلال السطور القادمة سوف اروي لكم قصة قصيرة درات احداثها في احد تلك الطوابير الطويلة الى حد ما اقدم ركم " غرام  ف البنزينة " ..

كان الوقت يقترب من الثامنة مساءا كان الطابور يزداد سيارات لا ينقص حيث ان هذه المنطقة التي تقع بها محطة الوقود من اشهر المناطق في محافظة القاهرة وفي منتصف الطابور كان هناك سيارة بيضاء من نوع البي ام .. كان سائق هذه السيارة فتاة في منتصف العشرينات تدعى " هند " , أصاب  هند حالة من الاعياء الشديدة فكان من الواضح عليها انها منذ وقت طويلة وانها في هذا الطابور الذي لا يتحرك رأها احد جيرانها في هذا الطابور وكان في اواخر العقد الثالث من عمره وكان يدعى محمود اسرع محمود حين رأى هند مصابة بهذه الحالة من الاعياء الى سيارة هند ليعرض عليها المساعدة ووجدها في حالة اغماء وهنا عاد الى سيارته سريعا واحضر شنطته الخاصة "حيث انه كان طبيبا حديث التخرج" وطلب من احد السيدات المتواجدات في الطابور مساعدته لافاقة عند وبالفعل ذهبا الاثنين الى سيارة هند واخرجت السيدة "برفان" من شنطة هند واسطاعت ان تعيد اليها الوعي برش بعض البرفان ف الاطار المحيط  بهند وبالفعل عاد اليها الوعي نوعا ما , هنا كان قد اعد محمود حقنة فيتامينات لاعطاءها لهند وبالفعل  بمساعدة السيدة اعطى محمود الحقنة لهند .. وهنا  عاد الوعي لهند بشكل كامل واستأذنت السيدة لان دورها قد اقترب لتموين سيارتها بالوقود ..
وبعد مغادرة السيدة .. دار هذا الحوار بين "هند" و "محمود" ..

محمود : الحمدلله على سلامة حضرتك ..
هند : الله يسلمك .. هو ايه اللي حصل ؟!   "وكانت مازالت متأثره بحالة من الاعياء البسيط"
محمود : حضرتك كان مغمى عليكي والحمدلله بفضل ربنا عاد اليكي الوعي بعد ان اعطيت لكي حقنة فيتامينات ..
هند : شكرا لحضرتك كتير بجد مش عارفة اقولك ايه .
محمود : الشكر لله وحده وبعدين شكر ايه بس انا معملتش الا الواجب وبعدين ايه حضرتك دي احنا خلاص بقينا جيران في الطابور .
هند : احسن جيران طبعا ... انا هند 25 سنة
محمود :  تشرفنا يا هند .. انا محمود 29 سنة ..  الا قوليلي كان مالك ليه اغمى عليكي ؟
هند : مفيش بس انا من الصبح بلف بالعربية ادور على بنزين والحمدلله لقيت هنا بنزين وواقفة هنا من الساعة 4 العصر ولحد دلوقتي واقفة ف الطابور ولسه باقي على دوري حوالي ساعة ..
محمود : انتي من المنطقة هنا ؟
هند : لا انا من مدينة نصر   وانت من المنطقة ؟
محمود :  انا من المهندسين ..
تبادلا الحديث حوال معاناتهم في طوابير البنزين وحول الاحوال السياسة في البلاد وقاربت الساعة التاسعة وكما كانت متوقعة هند ان دورها في الطابور سوف يحل بحلول التاسعة مساءا ولكن اتت الرياح بما تشتهي السفن .. فقد اعلن عامل البنزينة ان الوقود قد نفز وان العربة التي تأتي بالبنزين في طريقها الى المحطة وسوف يكون البنزين موجود في خلال ساعة على الاكثر .. هنا شعرت هند بان اليوم سوف يطول خاصة ان الوقود قد نفذ في سيارتها وكان عليها ان تمكث حتى تستطع ملئ خزان سيارتها بالوقود ... هنا استأذن محمود بالذهاب الي سيارته وقال انه سوف يعود سريعا  ذهب محمود الى سيارته واحضر بعد السندوتشات الجاهزة وبعض المشروبات الغازية وكانه يعلم ان سوف يمكث طويلا في هذا الطابور , عاد محمود الى سيارة هند ووجدها مازالت تندب حظها العثر .. واعطى لها بعض السندوتشات ولكنها رفضت ف البداية ولكنه اصر والح عليها وقال لها : لابد وان تاكلي اي حاجة علشان تقدري تقاومي ومتتعبيش تعاني لحد ما ترجعي البيت ... اخدت هند السندوتشات من محمود وبدئا في حديثهما ثانيا ..
هند : انت دكتور ؟
محمود : ايوه انا دكتور حديث التخرج . انتي بتدرسي ايه ؟
هند : انا اتخرجت من سنتين من كلية الحقوق بتقدير امتياز ..
محمود : يعني انتي دلوقتي معيدة ف الجامعة ..
ردت هند بصوت يكاد ان يختنق من الحزن .. : انا المفروض كنت اتعين معيدة بس للاسف في مصر لازم يكون لك "ضهر" علشان تتعين .. اخذوا ابن احد اقارب عميد الكلية بدل مني مع انها خريجة بتقدير جيد جدا ..
محمود : ربنا يوفقك في حاجة احسن ..

 وكان محمود قد الفت انتباهه منذ اللحظة الاولى .. وجه هند الجذاب ذات العيون الخضراء وكأي شب مصري وبخفة الدم المعتاده من المصريين .. قال لها مش معقول القمر ده مش مخطوب ..
ردت هند وكانت مكسوفة من كلام محمود .. وقالت احم احم قمر ايه يا دكتور صلي ع النبي ف قلبك .. انا مش مخطوبة ولا حاجة هو ده زمن حد بيتخطب فيه ..
محمود : هي الناس عميت ولا ايه لما القمر ده ميبقاش مخطوب امال مين اللي يتخطب بقى ..
انزلت هند وجهها ال الارض في كسوف شديد وقالت .. اللي فيه الخير يقدمه ربنا ..
وتبادلا الحديث الى ان جاءت الحادية عشر مساءا ولم تأت عربة الوقود الى محطة البنزين وشعرت هند بالملل واليأس ولكن لم يكن لديها خيار الا الانتظار .. وهنا رن هاتفها واذا باختها تطمئن عليها وقالت لها هند ان عربة الوقود في طريقها للمحطة وانها سوف تعود للمنزل خلال ساعة او اكثر .. انهت المكالمة وقالت هند لمحمود احكي لي عن نفسك  بما اننا بنتكلم .. قال محمود : انا اعمل منذ بداية العام في مستشفى حكومي براتب 700 جنيه فقط ومش بتكفي البنزين بس والبركة في السيد الوالد هو اللي متولي حاليا تجهيز عيادتي الخاصة .. ومش خاطب ومكنتش ناوي اخطب بس غيرت رأيي من شوية صغيريين بس .. قاطعته هند وقالت له .. خطوبة مين بس جهز عيادتك وابقى شوف الخطوبة وكدا . "ومن خلال تلك الجملة شعر محمود بان هند مكسوفة منه وتريد تغيير الموضوع والتحدث في شئ اخر " واكلمت هند حديثها قائلة انت واقف هنا من امتى قال لها من الساعة الخامسة عصرا ...
وبعد ساعة من حديثهما المتواصل والذي اقتربا من بعض اكثر واكثر وكل شخص عرف عن الاخر اشياء كثيرة واصبحا في حكم الاصدقاء المقربين وكانت علاقتهما من 4 ساعات فقط .. وحل منتصف الليل وجاءت عربة الوقود الكبيرة .. واقتر ب دور هند بينما دور محمود كان بعدها بسياراتين .. ويعد حديث طويل سادت حالة من الصمت وكان كل منها يفكر في كلام الاخر ويبدو ان حالة من الاعجاب تاجه الاخر قد شعرا بها كلا الشخصين .. وبعد فترة من التفكير سألها محمود وقال : مرتبطة او ارتبطي قبل كدا ..؟
هند : مش بفكر في الموضوع ده كل حياتي كانت ف المذاكرة وبس ومكنش عندي وقت احب والكلام ده .
وهنا تجرأ محمود واخذ خطوة تكاد ان تكون متسرعة خاصة وان علاقتهما عمرها ساعات ليس اكثر .. وقال لها : انا معجب بشخصيتك جداا ..
زهلت هند من هذه الجملة ولم تستطع الرد  .
اكمل محمود كلامه قائلا .. انتي انسانة محترمة وخلوقة وشخصيتك جميلة وهي دي كل الصفات اللي بتمناها في الانسانة اللي اتمنى اني اتجوها .
هنا ارتبكت هند وهربت الكلمات من على لسانها من سعادتها ولكنها اخفت تلك السعادة ..
وكان يبدو ان محمود يريد ان يأخذ خطوة جادة في علاقته البسيطة بهند وقال لها دون خجل .. انا عايز اتجوزك .. وكررها اكثر من مرة .. هنا عاد النطق لهند وقالت له .. انت اكيد مجنون .. بتطلب الجواز من بنت لسه عارفها من ساعات بس وكمان لسه معرفتنيش كويس .. قاطعها محمود قائلا اني اشعر وكأنني اعرفك منذ  زمن طويل واريد ان ارتبط بكي بشكل رسمي في اسرع وقت .. فما رأيك ؟!
ردت هند سريعا : انا مقدرش انكر انك  انسان كويس ومحترم واي واحدة تتمناك
محمود : يعني موافقة ؟
هند : انا لسه عايزة اعرفك اكتر .. بس احب اقولك اني موافقة ..
ولم يصدق محمود ما يسمعه باذنيه وقال لها انها اسعد لحظات حياته التي يعيشها الان ...
وقال لها امتى أأتي لكي اقابل والدك ؟؟
ردت هند : بابا .. عايز تقابل بابا ..
اجاب محمود ضاحكا .. امال هقابل ماما ..
هند : وضحكت بطريقة هستيرية وقالت بابا منذ الحادية عشرصباحا وهو هنا ف البنزينة ..
واتصلت هند بوالدها .. لكي تتاكد انه مازال في البنزينة .. رد والدها عرفت منه انه قد غادر البنزينة منذ ساعتين لمرض احد جيرانه في طابور السيارات وكان لابد من نقله الى المستشفى .. وقد اخذه في سيارته الى اقرب مستشفى وبعد ما اطمأن عليه ووصل اهل هذا الشخص غادر والد هند الى المنزل لكي يستريح .. وقالت له هند ان دورها ف الطابور قد حان وانها سوف تعود للمنزل خلال نصف ساعة ..أغلقت الهاتف واخبرت محمود بما حدث مع والدها .. فقال محمود : اني انا وبابا سوف نأتي غدا لكي نطلب يدك من والدك ..
أجابت هند بالموافقة على هذا الاقتراح وكانت سعادتهما غامرة .. وغادرت هند البنزينة في تمام الواحدة ونصف صباحا عائدة الى المنزل لتخبرهم بما حدث وحان دور محمود في الطابور وعاد الى منزله وبات يهجز نفسه لزيارة والد هند في اليوم التالي ..........

ازمة البنزين مؤامرة من حريم السلطان ...

حوار دار على احد مصاطب قرية بسيطة في ارياف مصر طرفي الحوار رجلين يتعدوا ال60 عاما وبحكم سنهم يجلسون امام التلفاز يتابعوا الاحداث السياسية الساخنة واهمها دور هيام خانو في اسقاط السلطان سليمان وبالطبع تأثيرها في ازمة البنزين .. المهم في هذا الحوار انهم تحدثوا حول مشكلة البنزين واسبابها والجدير بالذكر انهم من مؤيدي النظام ويتابعون الاعلامي ابو قلب ابيض خالد عبدالله ..
قال ابو احمد لجاره على المصطبه ابوخليل : تفتكر يابوخليل ايه سبب المشكلة بتاع البنزين اللي بيقولوا عليها ف التلفزيون دي بقالهم كذا شهر ..
ابوخليل : ازمة ايه وتلفزيون ايه انتي شوفتها على قناة ايه ؟
ابو احمد : مش عارف والله قناة ايه الواد احمد هو اللي يعرف هنادي عليه يقولك .. انت ياواد ياحمد انت يابن الجذمة خد كلم عمك ابو خليل عايزك ..
احمد : ايوه ياحج اؤمر ؟
ابو احمد : ايه القناة اللي كنا بسمع عليها حريم السلطان امبارح وبعدين شوفنا عليها النشرة ..
احمد : دي قناة الحياة يا حج ..
ابوخليل : بتسمعوا قناة الحياة بتاعت الفلول والكفرة اللي بيقبضوا ف الحلقة الواحد 10 مليون جنيه وواجبة كنتاكي ..
ابو احمد : ابدا ابدا يابو خليل دي العيال كانوا بيسمعوا حريم السلطان .
ابو خليل : سيبك من القنوات دي يا راجل اسمع كلام الناس بتوع ربنا على قناة الناس والحافظ والخليجية دي ناس تعرف ربنا ومربية دقونهم ومش معقول يعني هيكدبوا ..

ابو احمد : مانا بتفرج عليهم بس وقت المسلسل بجيب قناة الحياة ..
ابو خليل : بيقولوا يابواحمد ان سبب الازمة دي ان الفلول بياخدوا عربيات البنزين ويروحوا يفضوها  ف  الصحرا علشان يعملوا ازمة .. لا وكمان بياخدوا تمنها من الجدع اللي اسمه حمدين بتاع جبهة الخراب ده ..
ابو احمد : انا سمعت امبارح من الشيخ بعد صلاة العصر ان الكنيسة بيخزنوا عندهم البنزين ده علشان يعملوا ازمة ف البلد وبيوزعوه على بعض والباقي بيستخدموه علشان يولعوا ف الجوامع وبيوت المسلمين .
ابوخليل : لا دا بيقولوا كمان ان الرجل بتاع امريكا اللي اسمه البرادعي هو اللي بيدفع لسواقين العربيات دي علشان يفضوه ف البحر والازمة تولع ..
ابواحمد : بس انا يابو خليل سمعت الوزير من شوية بيقول ان مفيش ازمة وان كل الاخبار دي كلها كدب .
ابوخليل : دي حقيقة مفيش ازمة ولا حاجة دي كلها اشاعات من الاعلاميين اللي بيقبضوا من النظام السابق
ابو احمد : ربنا يحرقهم بجاز وسخ يا راجل دي مش بيقولوا غير اشاعات .
ابو خليل : الشيخ خالد امبارح قال ان الفلول بيهربوا البنزين والسولار لاسرائيل علشان الازمة تزيد ..
ابو احمد : ازمة ايه .. مش انت بتقول ان مفيش ازمة ..
ابوخليل : والله انا ما بقيت عارف حاجة هما الشيوخ اللي بيقولوا كدا ومش معقول يعني هما هيكدبوا علينا دول ناس بتوع ربنا ..
ابو احمد : عندك حق يا راجل ازمة ولا مش ازمة بقى احنا مالنا المهم فضيلة الرئيس كان امبارح منور الاستاد ربنا يباركله ف دقنه ..
ابوخليل : بسم الله ماشاء الله كان واقف زي الاسد .
ابو احمد : بعد اذنك بقى هقوم اكمل المسلسل ..
ابوخليل : وانا كمان هروح اضرب حجرين شيشة قبل صلاة العشا
ابو احمد : اوك يا برنس ...:D

" القدس ستحرر من #arab_idol "

تنطلق غدا الجمعة الحلقة قبل الاخيرة من الموسم الثاني من برنامج ارب ايدول الغنائي والذي بدأ في بداية حلقاته بالعديد من المتسابقين والمتسابقات من مختلف البلدان العربية ... واستذاف البرنامج خلال حلقاته العديد من النجوم والفنانين العرب كان منهم الكينج منير ... ومن الواضح ان ميزانية هذا البرنامج ذات السعودي حسي تنتجه قنوات MBC االسعودية وتقام فاعلياته في العاصمة اللبنانية بيروت ... 

يتنافس في المرحلة الاخيرة والتي ستقام على يومي الجمعه والسبت كلا من محمد عساف من فلسطين .. واحمد جمال من مصر وفرح يوسف من سوريا .. وبما ان تصويت الجمهور يلعب الدور الفعال في تحديد الفائز في هذا الموسم ونظرا لان محمد عساف الفلسطيني واحمد جمال المصري هم المتنافسان الاقرب لحصد اللقب فان سباق التصويت اشتد بين جمهوري المتنافسين الى ان تطور الامر الى صراع بين بلدين من اقرب البلدن لبعض مصر وفلسطين .. ومن شدة التنافس بين الجمهورين فاصبح العديد من المصريين يكيلون بالسباب والشتائم للفلسطنيين والعكس يحدث بالفعل وكل هذا بسبب مسابقة غنائية لن يجني مكاسبها سوى العقول التافهة صاحبة فكرة البرنامج والفائز باللقب فهو من ستنتج له الاغاني وهو من سيحصد المال والالقاب الغنائية ولن تنل بلده منه سو السباب والشتائم من معارضيه . هذا الامر اشبه بالخلل النفسي لدى معجبي المتسابقين ..  فالتاريخ المشترك بين الوطن المصري والوطن الفلسطيني جاء بعض المعتوهين والصبايا ليدنسوه بالسباب لبعضهم البعض .. فالدماء الطاهر المشترك بين الشعبين ف الحروب التي خاضوها جانبا الى جنب هي الصامدة ليست اصواتكم ف المسابقة من يريد الخير لوطنه عليه بان يترك مثل هذه الخرفات ويعمل حتى ينصر وطنه في المجالات العلمية .. ففي الموسم الاول من البرنامج ذاته فازت المصرية كارمن سليمان باللقب بعد منافسة شرسة ايضا مع المغربية دينا بطمة وشهدت تلك المنافسة ايضا حرب كلامية بين شعبي البلدين الشقيقين او بمعنى ادق بين المعتوهين من شعبي الدولتين العربيتين ..وتم توجيه الاتهام لادارة البرنامج بالتحيز للمتسابقة المصرية على حساب المغربية وتزوير النتائج لصالحها ... وهو الامر الذي يحدث حاليا بين الجمهورين فكل منهما يوجه اتهامات مسبق لادارة البرنامج بتزوير النتائج والتحيز لمتسابق دون الاخر ... ويا للعجب فيبدو من حماستهم للمتسابق المنتمي لبلدهم تشعر وانهم سوف يفعل لتلك البلد ما لم يعله شخصا غير .. فتشعر ان محمد عساف بفوزه بالارب ايدول اه سوف يحرر القدس .. وعلى الجانب الاخر فان الجمهور المصري متحمس لاحمد جمال وكأنه هو من سوف يرتقي بمصر الى مصاف الدول الكبرى في الاقتصاد والتنولوجيا ... فلماذا لم نر حماستكم هذه في ترشيح احد من علماء مصر لجائزة نوبل ... وانا من موقعي هذا وبناءا على هذه الحماسة ادعوا الى التصويت للمتسابقة الثالثة فرح يوسف السورية وذلك لنصرة الشعب السوري ونصرة ثورته .. وكمان فرح موزة بردو .. وفوزها مصلحة لينا كلنا :D

احنا بقينا ف مجتمع مبتذل الجزء -1-

احنا بقينا ف مجتمع مبتذل ..  دي هتكون باذن الله سلسلة تدوينات على اكتر من جزء

وف الجزء ده هنتكلم بشكل اوضح عن الابتذال ف مجال الاعلام ...

احنا بقينا ف مجتمع مبتذل الجزء -1-

الابتذال ف المجتمع  ده مش كلام ف الهوا انما دي حقيقة ملموسة ف كل حياتنا ف الاعلام ف السينما  ف الفن ف السلع الغذائية ف الرياضة حتى ف السياسة فيه ابتذال والمصيبة الكبرى ان الدين كمان بقى فيه ابتذال .. تعالوا بقى نذكر مجموعة من نواحي الابتذال ف المجتمع المصري على سبيل المثال لا الحصر لان ما شاء الله الابتذال ف المجتمع بقى في احسن صوره ...
نبدأ ف اول ناحية من نواحي الابتذال وهي ف الاعلام والسينما ... الاعلام .. لما تلاقي توفيق عكاشة طالع يرغي كأنه قاعد على مصطبه والالفاظ اللي بيطلعها فده ابتذال اعلامي ليس له علاقة بالاعلام الصحيح .. ولما ابو اسماعيل يطلع ف برنامج يشتم ف ده وده ومحدش يحاسبه يبقى ده ابتذال لما اشباه الرجال زي عبدالله بدر ومحمود شعبان وشيوخ القنوات التي تسمى "بالاسلامية" يطعنوا ف شرف النساء المشاكات ف الثورة يبقى ده قمة الابتذال والوقاحة وقلة الادب .. ولما محدش يحاسبهم يبقى بردو ابتذال ...
ندخل بقى ع السينما ومجرد ذكر اسم " السبكي " ف السينما ده لوحده كافي لشرح المعنى الكامل لمصطلح الابتذال ف السينما دلوقتي تجيب ممثل فاشل ورقاصة وكم واحدة من اللي جسمهم رخيص ومطرب حشاش ووتعمل بيهم فيلم ورغم انه هيبقى فيلم هابط الا انه هيجيب فلووس كتير لان طبيعة المجتمع المبتذال تعتبر ارض خصبة لتسويق مثل هذه الافلام والاعمال الهابطة اخلاقيا وعلى سبيل المثال فيلم "عبدو موته" و"تتح" وغيرها من الافلام المبتذلة ... نروح بقى للابتذال ف القنوات التليفزيونية .. على رأسهم قنوات التت والمولد  وشعبيات ودربوكا .. دي كلها قنوات للاغاني التي تسمى بالشعبية بس عمرها ما كانت شعبية دي شوية اغاني لعيال خمورجية بيقولوا اي كلام وخلاص واللي بيكون ف اوقات كتيرة +18 … ده طبعا غير الرقاصات والمودليز العريانة اللي ف الكليبات دي .. وطبعا الابتذال ف الاغاني خير ممثل ليه اوكا واورتيجا وقبلهم سعد الصغير في جزء كبير من اغانيه .. كدا احنا خلصنا جزء السينما والاعلام والفن ندخل بقى ع الابتذال ف الابتذال ف الاعلانات وعلى رأسها اعلانات الضعف الجنسي ومستحضرات التجميل واللحاف العجيب واللاصقة السحرية واللي 90% من الاعلانات دي بتكون +18 والفظيع بقى ان الاعلانات بتكون ع القنوات الاكثر مشاهدة من كل افراد الاسرة زي قنوات المسلسلات والافلام واحيانا بتكون ع القنوات الدينية .. نيجي بقى للابتذال ف السلع الغذائية واهما طبعا سينا كولا ف المشروبات الغازية .. المثال ده لوحده كفيل بتوضيح مدى الابتذال والتقليد الغير منضبط للمنتاجات المماثلة له ف السوق ومش هرغي كتير ف الجزئية دي لانها متستاهلش اصلا ... كدا احنا ف الجزء ده من سلسلة تدوينات " احنا بقينا ف مجتمع مبتذل " ذكرنا اتجاه من اتجاهات الابتذال الواضح اوي ف المجتمع والشارع المصري .. نقول بقى ايه هي الحلول المقترحة لمعالجة الابتذال ده ومنعه .. والحل الوحيد للمشكلة دي هو اننا تكون فيه هيئات دورها يكون مفعل 100% وتكون قرارتها نافذة وتنفذ مهما كانت الجهة المعترضة عليها .. ممكن تكون الهيئات والمؤسسات دي موجودة بالفعل بس دورها مش مفعل بالشكل المظبوط .. وكل هيئة مختص بجانب من جوانب المجتمع مثلا هيئة تراخيص القنوات الفضائية .. انها تضع كراسة للشروط التي لابد من توافرها لكي تحصل القناة على الترخيص... والشروط دي لازم تكون على اعلى مستوي من الانضباط والاخلاق العامة التي يجب ان يكون عليها المجتمع كافة ويشارك ف وضع هذه الشروط شيخ ازهري ودكتور ف علم النفس .. واساتذة متخصصين ف المجال اللي هتكون القناة ممثلة ليه وهكذا تطبق الفكرة في كافة الاتجاهات ...

ان شاء الله الجزء القادم من " احنا بقينا ف مجتمع مبتذل "  هيكون حول تصرفات الشباب والبنات المبتذلة وايه الحلول للمشكلة دي ....