العسكر حامي الشرعية .. "قصة قصيرة" الجزء الاول

"لم يفلح الخائنون في اسقاط البلاد في الهاوية وفرض رأيهم على الشعب ولكن الشعب خرج وحافظ على الشرعية شرعية اول رئيس منتخب بعد ثورة يناير المجيدة .. الشرعية هي شرعية الشعب والشعب هو صاحب الشرعية وانا قد وعدتكم في خطابا سابق بانني سوف احافظ على الشرعية الدستورية لاخر نقطة في دمي .. واخيرا اقول هنيئا لكم نصر اكتوبر العظيم ونصر الحفاظ على شرعية اول رئيس منتخب بعد ثورتنا المجيدة "

مذيع بالتليفزيون المصري :
"هكذا كان خطاب فخامة الرئيس محمد مرسي - اطال الله في مدته الرئاسية وحافظ على شرعيته - بمناسبة ذكري نصر السادس من اكتوبر وها نحن نحتفل بالسنة الاربعين لنصر الجيش على قوات الاحتلال ونحتفل ايضا بمرور ما يقرب من ال100 يوما على انتصار جيشنا وعبوره الثاني والانحياز لرغبة الشعب الذي خرج في ميادين الثورة حيث كان يطالبون بالحفاظ على الشرعية وعدم الانسياق للخونة واصحاب الاجندات الخارجية والممولين من الخارج وفي هذه الذكرى المجيدة سنعرض لكم فيلم تسجيلي وثائقي عن الاحداث من يوم 30-6 الى يومنا هذا"

**يوم 30-6 ...

خروج مظاهرات عديدة والتي دعت اليها حركة تمرد وعدد من الحركات والاحزاب المعارضة لاسقاط ما اسموه نظام الاخوان واسقاط الرئيس محمد مرسي .. انتشرت الاكاذيب حول عدد هؤلاء المتظاهرين في التحرير والاتحادية وبعض المحافظات منهم من قال انهم ملايين10 والبعض قال 20 مليون بينما ذهب اخرون الى ان عدد المتظاهرين وصل الى 30 مليون متظاهر ..ولكن العدد مجملا لا يتعدى ال200 الف متظاهر في القاهرة ومئات المتظاهرين في بعض المحافظات ورغم محاولاتهم التخريبية لزعزعة الامن والاستقرار كانت قوات الشرطة تراعي ضبط النفس معهم وقتل في اخر هذا اليوم 20 بلطجي اثناء مهاجمتهم مقرات حزب الحرية والعدالة بالمحافظات برصاص بعض منهم وذلك بسبب خلافهم حول تقسيم المسروقات .

**يوم 1-7 ...

 استمرارا لمظاهرات المعارضة والاعداد في تراجع شديد ولكن على النقيض خرجت مسيرات مليونية بالمحافظات والقاهرة تأييدا لفخامة الرئيس محمد مرسي ولكي تحمي الشرعية الاعداد تراوحت ما بين مليون متظاهر في كل مسيرة في الاقاليم ولكن عدد المتظاهرين في القاهرة المطالبين بالحفاظ على الشرعية كان يتعدى ال50 مليون وذلك حسب احصاءات رئاسة الجمهورية .
وجاء دور الجيش عصر هذا اليوم واصدر بيانه الاول منذ بدأ هذه التظاهرات وقال خلاله "نمهل الجميع 48 ساعة لتنفيذ مطالب الشعب والا سوف يتدخل الجيش لحماية ارادة الشعب"

**3-7 ...

مرت ال48 ساعة مهلة الجيش للجميع والكل في انتظار ماذا سوف يسفر عنه اجتماع القيادات السياسية بقيادات الجيش وذلك في ظل استمرار اعداد هزيلة من مظاهرات المعارضة وازدياد في حشود حماة الشرعية والشريعة في القاهرة والمحافظات ... وفي تمام التاسعة مساءا تم التنويه عن بيان الجيش  بانه سوف يكون بعد دقائق .. صمتت الميادين في انتظار بيان الجيش فهل سيكون مع الشرعية الدستورية ام سيكون مع من .. لحظات ويبدأ البيان حالة صمت رهيبة سادت جميع انحاء البلاد وكان يشبه الهدوء الذي يكون قبل العاصفة .

الان بيان الجيش على لسان الفريق اول عبدالفتاح السيسي "القائد العام للقوات المسلحة"
- بعد اجتماعنا برموز القوى الوطنية والسياسية والشخصيات العامة في مصر وهم السيد عصام العريان , الدكتور محمد بديع , الشيخ ياسر برهامي , الدكتور محمد البلتاجي , السيد عصام سلطان , الدكتور ايمن نور , والست ام يمن ..

توصلنا الى عدة نقاط لتنفيذ رغبة وارادة الشعب المصري والذي خرج الى الشارع طالبا منا الحفاظ على الشرعية .. وها نحن ننفذ ارادة الشعب ..
1- الحفاظ على الشرعية شرعية السيد رئيس الجمهورية اول رئيس مدني منتخب للبلاد.
2- الحفاظ على ارادة الشعب وشرعيته وعدم السماح لاحد بالمساس بالشرعية والشريعة.

3- انتشار قواتنا المسلحة بالشوارع والميادين لحماية الشعب والحفاظ على شرعيته.

4- مد العمل بالدستور مدى الحياة والغاء ما يمسى بالمحكمة الدستورية .

عاشت مصر وعاش رئيسها محافظا على شرعيته وتولع ميتين ام المعارضة

انتهى البيان .

وفور انتهاء البيان سادت حالة من الفرح السعادة ونشوة الانتصار في مسيرات ابناء مصر الابرار الذي خرجوا للحفاظ على شرعية الرئيس وارادة الشعب والحفاظ على ديموقراطية الصناديق وعلى الاغاني الصاخبة المؤيدة للرئيس وللجيش سهر ابناء شعبنا المختار .. وسادت خيبة امل بين شراذم المعارضة المأجورة ووتجمعوا بميدان التحرير واعلنوا اعتصامهم حتى رحيل الرئيس ورحيل العسكر .

وبعد بيان السيسي تم اغلاق عدد من القنوات المحرضة على العنف والتخريب واشعال نيران الفوضى في مصر وهي قناة ontv  وقناة cbc  وقنوات النهار والحياة والقاهرة والناس وتم اعتقال عدد كبير من اعلاميو هذه القنوات .. واستمر الشعب في الاحتفال بجيشه ورئيس جمهوريته فرحا بالحفاظ على الشرعية وقام الفنان الكبير مصطفى كامل ابن الوطن البار ومعه نخبة من فنانو مصر من مؤيدي الشرعية والجيش بغناء اوبريت "يسلم اللسان" وجاء كلماته كالتالي "يسلم اللسان .. اللي قال البيان .. واعتقل اللي خان .. وحافظ على الشرعية وقال طظ في كل جبان" واصبح الشعب المحب لجيشه ورئيسه يردد تلك الكلمات الجميلة ليلا وصباحا وكانت مصدر فرحه وسعادة لجميع فئات الشعب وحين يسمع  هؤلاء الخونة من المعارضة تلك الكلمات حتى يخروا بكاءا وخوفا من الجيش والشعب والشرعية .

ما قبل فض اعتصام التحرير ..
استطاعت احد القنوات المأجورة من اجهزة المخابرات الغربية من البث المباشر من اعتصام الخونة في ميدان التحرير واخذت تلك القناة في فبركة الاخبار عن اشتباكات وقتلة واصابات بين هؤلاء المأجورين وقواتنا المسلحة في شوارع محمد محمود والشيخ ريحان ومحيط وزارة الداخلية وطبقا لمصادر امنية ان القتلة والمصابين كانوا من الاشخاص الذين كانوا يريدون الخروج من هذا الاعتصام ولكن قيادات تلك الاعتصام الخائن كانوا يمنعوهم ويعذبهوهم وقتلوا بعضهم ليرهبوا من يحاول ان يفكر في الهروب من تلك البؤرة الخبيثة ..

وبناءا على معلومات استخباراتيه مصرية فان مجموعات قتالية من صربيا ومجموعات اخرى شبه مسلحة تنضوى تحت راية 6 ابريل متواجده داخل هذا الاعتصام الخبيث وزادت مطالبات الشعب للجيش والشرطة بفض اعتصام التحرير 

الجزء الثاني خلال 5 ايام . شكرا لكم 

باسم يوسف ... صوت الثوار

وبعد انتهاء الحلقة بل واثنائها تعددت الشتائم والاتهامات لباسم يوسف ومن المرات القليلة جدا ان يتفق الفلول والاخوان على ان باسم عميل وخاين وابن ستين تيت وده في حد ذاته انجاز لباسم يوسف .. انت كشخص لما تلاقي الاخوان والفلول ضدك يبقى انت كدا شخصية ناجحة مليوون في المية ده جزء .. الشق التاني من الموضوع هو عدم اهتزاز ثقة الثوار بباسم يوسف بل زادت وشعروا بالطمأنينة بعد ان تهاوى من ذهنهم الشكوك في مدى مهاجمة باسم لسياسة العسكر , والاخوة والاخوات اللي بيموتوا في دباديب السيسي بتاعهم ايام مرسي كان باسم بالنسبة لهم سكرة علشان بيهاجم الاخوان , وبعد الحلقة الاولى من الموسم الجديد للبرنامج بدأوا يشتموا في باسم .. احب اقولهم جملة بسيطة .. هو انتوا لسه شوفتوا حاجه .. ولسه اللي جاي احلى :P

وباسم بعد الحلقة اخد لقب .. طابور خامس وده في حد ذاته شرف  واحنا كطابور خامس قديم . انبسطنا :D

والاخوة الفلول علشان يبينوا انهم مش ضد مهاجمة السيسي بيقولوا " يرضيك ان باسم قال افيهات خارجة "... في دي عندك حق ... بس مانت الافيهات دي كانت بتفشخك ضحك ايام مرسي .. اشمعنا ايام السيسي مش عجباك !! وبصراحة بقى يرضيني .. انا راجل لعين ياخي بموت ف السفالة:D

ويمكن تلخيص البرنامج كله ايام طنطاوي ومرسي والسيسي ... في الـ3 جمل دول :

في الموسم الاول من البرنامج ايام طنطاوي : الفلول كانوا بيشتموا باسم والاخوان بيحبوا باسم والثوار عاجبهم باسم وساكتين

في الموسم الثاني من البرنامج ايام مرسي : الاخوان كانوا بيشتموا باسم والفلول بيحبوا باسم والثوار عاجبهم باسم وساكتين

في الموسم التالت من البرنامج ايام عدلي قصدي السيسي : الاخوان والفلول بيشتموا باسم والثوار هنا بقى عاجبهم باسم و بردو ساكتين ... المجد للاحرار الثابتين على القرار :D

ماما شرطة و بابا عسكر

بص يا مواطن يا حبيبي !

  اوعى تزعل ماما "شرطة" او تضايقها دي هي اللي بتحمينا من البلطجية الوحشين
وهي كمان اللي بتلفق قضايا للمخربين اللي بيعملوا مظاهرات
وهي كمان يا حبيبي اللي بتعذب الشباب في السجون علشان بردو تحمينا
وهي بردو اللي بتشتمك علشان خايفة عليك من الناس الوحشة
اوعى تشتم ماما شرطة وتقول عليها بلطجية احسن تزعل منك خالص وتاخد على خاطرها ودي لو خدت على خاطرها هتاخدك على القسم تعلقك من رجليك
ماما شرطة يا حبيبي هي اللي بتستغطى علشان تعريك .. هي اللي بتزعق علشان تكتم صوتك هي بردو اللي بتاكل علشان تجوعك وفوق ده كله ماما شرطة مرات بابا "عسكر " عارف يعني ايه بابا عسكر .. يعني الكل في الكل .. يعني كل حاجه في اي وقت يعني هو اللي معاه مصروف البيت وجدو عدلي منصور راجل طيب وغلبان مش بتاع كلام كتير بص يا حبيبي يا مواطن يا غلبان وقرفان هي جملة وملهاش كمالة ... يا تعيش بمزاج ماما شرطة وبابا عسكر .. يا اما بردو هتعيش بمزاج ماما شرطة وبابا عسكر ,, عارف يعني ايه بابا عسكر يعني هو اللي بيحمينا من الارهاب اهو يعني مفهوم الارهاب عند بابا مختلف شوية بس اهو بيحمينا منه وخلاص .. عارف مين هو الارهاب ده اللي قتل اخواتنا في سينا وقدام الكنايس والارهاب بردو اللي قتل الناس ف رابعة والنهضة مش شرط يكون الارهاب جماعات او تنظيم,, الارهاب ممكن يكون نظام وسلطة ؟!!!
واوعى تصدق اي حد يقولك ان بابا عسكر هو اللي قتل مينا وعماد او في يوم عرى ست البنات !وكداب اللي يقولك ان ماما شرطة قتلت جيكا او قفلت الباب على انس ولا عذبت خالد ف سجونها ...
اوعى ف يوم تزعل ماما شرطة او بابا عسكر ... شطور يا مواطن !

قولي سبب واحد يخليك تقول عليها ام الدنيا ؟!!

#مصر أم الدنيا بامارة ايه ...

بامارة مستوى التعليم اللي زي الزفت ؟
بامارة نسبة الجهل والفقر اللي ف المجتمع ؟
بامارة ان فيه ناس مش بتلاقي تاكل ولا لاقيه مكان تنام فيه ؟
بامارة ان السينما بتاعتنا بقت عبارة عن رقاصة وبلطجي ؟
بامارة الاعلام اللي بينقل اخبار على مزاجه وحسب انتمائه ؟
بامارة العنصرية اللي ف البلد ؟
بامارة انك تدرس اكتر من 16 سنة وف الاخر متلاقيش مكان يشغلك؟
بامارة انك لكل خطوة في حياتك عايز واسطة ؟
بامارة انك مش قادر تتجوز اللي بتحبها علشان ظروفك المادية ؟
بامارة اننا شغالين قتل في بعض علشان خاطر كرسي سلطة وخناقة سياسية بين اتنين عايزين يسرقوا البلد ؟
بامارة اننا بد 40 سنة من نصر اكتوبر رجنا 400 سنة لورا واسرائيل بد 40 سنة من الهزيمة اتقدمت 400 سنة لقدام ؟
بامارة اننا بنكتب التاريخ على مزاجنا وحسب مصالحنا ؟
بامارة ان اي نظام بيستخدم الاجهزة الامنية للافترا على الشعب ؟
بامارة اننا بنستخدم الدين لمصالح سياسية واجتماعية ؟
بامارة ان اللي كانوا عاملين نفسهم ثوريين اول ما دخلوا الحكومة بقوا كلاب سلطة ؟
بامارة ان التحرش بقت صفة رسمية ف ام المجتمع ده ؟
بامارة عدم احترام حقوق الغلابة والفقراء ؟
بامارة اننا عندنا احباط من المستقبل ؟
بامارة مستوى البحث العلمي بتاعنا ؟

قولي سبب واحد يخليك تقول عليها ام الدنيا ؟!!